Përditësim #14: Mbjellja e 10 000 fidanëve!!! / Tetor 17, 2022

Është shumë emocionuese për ne të ndajmë me ju planet e vjeshtës për 2022. Falë mbështetjes së komunitetit dhe donatorëve do të mund të dyfishojmë numrin e fidanëve të planifikuar për mbjellje nga 5 000 në 10 000 fidanë.

Në vitin 2021 arritëm të mblidhnim fonde dhe të mbillnim 2 712 fidanë. Ishte eventi jonë i parë i mbjelljes dhe e morëm ‘avash-avash’ duke i mbajtur objektivat sa më realistë. Kjo na ndihmoi sidomos për të fituar eksperiencën e duhur. Përveçse mësuam shumë, jemi akoma më të lumtur për rezultatet me 78% përqindje mbijetueshmërie për fidanët e mbjellë në vitin e parë.

Një falenderim për të gjithë ata që na kanë mbështetur dhe kanë bërë donacione!

Zgjerimi i operacionit të ripyllëzimit nuk do të mund të realizohej pa mbështetjen e çmueshme të komunitetit internacional të motoçiklistëve (disa prej tyre na mbështesin periodikisht, e ndaj tyre jemi veçanërisht falenderues!), si dhe të donatorëve të sektorit privat Fry-IT, Ltd. nga UK, Shirt-King & Button-King nga Gjermania, Car Tirana dhe ALGRAFIKA nga Shqipëria.

Falenderojmë gjithashtu Fidanishte Xhepi për furnizimin me fidanë me një çmim të ulët, duke na ndihmuar në misionin e ripyllëzimit.

Ku dhe si do të mbjellim këtë vit?

Duke qenë se numri i fidanëve që do mbjellim sivjet është shumë gati katër herë sa numri i fidanëve të mbjellë në vitin e parë, rrjedhimisht edhe sipërfaqja e terrenit do të jetë më e madhe duke kaluar nga një sipërfaqe ripyllëzimi prej 1.6ha në 6.5ha.

Operacioni i mbjelljes do të zgjasë rrethi një muaj, nga data 22 tetor 2022 deri në 20 nëntor 2022.

Hapat e operacionit të ripyllëzimit

Si fillim do pregatisim zonën e mbjelljes në 22-23 tetor duke e monitoruar, fotografuar, piketuar dhe duke qartësuar detajet e fundit logjistike të mbjelljes.

Më pas do vijohet me hapjen e 10 000 gropave në 24 tetor. Kjo fazë realizohet tërësisht nga punëtorë që jetojnë në Lurë, të cilët do kenë mundësi të bëjnë një punë sezonale për katër javë, deri në javën e tretë të nentorit.

Mbjellja e fidanëve do të fillojë në 29 tetor. Gjatë javës do mbjellin punëtorët, si dhe në fundjavë do mbjellin grupe të ndryshme vullnetarësh. Kjo fazë do zgjasë deri nê datë 20 nëntor.

Vullnetarët & ekipi i punëtorëve

Mbjellja e pemëve do të kryhet nga punëtorë vendas dhe grupe vullnetare, me një objektiv mbjellje prej 2 500 fidanësh. Duke u bazuar dhe në eksperiencën e vitit të shkuar, duam që sivjet të oforjmë më shumë mundësi punësimi për banorët e Lurës dhe të reduktojmë numrin e vullnetarëve të përfshirë.

Vullnetarët do mbjellin fidanë vetëm gjatë fundjavave (fundjavën e fundit të tetorit, si dhe fundjavën e parë, të dytë dhe të tretë të nëntorit). Gjithashtu, vullnetarët nuk do të kenë një numër të përcaktuar fidanësh për të mbjellë gjatë eventeve të fundjavave. Kjo do të lejojë vullnetarët të marrin kohën e duhur për të mbjellë me kujdes si dhe do e bëjë më të lehtë punën e grupit tonë për të monitoruar mbjelljen. E mbi të gjitha, do lejojë grupet vullnetare të shijojnë Parkun Kombëtar të Lurë-Mali Dejës.

Punëtorët vendas do mbjellin fidanë gjatë javes ku, sikurse në fazën e hapjes së gropave, objektivi do të jetë 2 500 fidanë të mbjellë për çdo javë.

Shpresojmë që kjo mënurë e re pune të realizohet pa probleme, të ofrojë mundësi punësimi dhe tê ardhura monetare të nevojshme në fshat, si dhe të bëjë që eventet me grupet vullnetare të jenë argëtuese dhe emocionuese.

Në emër të gjithë ekipit,
Pavel