Përditësim #9 / Tetor 1, 2021

Jam jashtëzakonisht i lumtur që ndaj me ju këtë përditësim. Trees for Lurë ka bërë një hap të madh përpara dhe kemi kaluar nga aktivitetet përgatitore/të dokumenteve në fazën që më në fund “të përveshim mëngët”!

Kemi hapur 2 550 gropa!

Kemi arritur të gërmojmë 2 500 gropa (plus 50 të tjera ekstra) në vetëm 3 ditë, kur kishim parashikuar 10 ditë për këtë proces. Falenderime të mëdha për punën shkojnë për ekipin vendas me të cilin kemi punuar.

Gropat ndryshojnë në madhësi por janë sipas përcaktimeve të projektit, nga 30x30x30cm deri në 40x40x35cm për të përshtatur fidanët me madhësi të ndryshme që do të mbillen.

Kam respektin më të madh për çdo person që vendosi të na ndihmojë me këtë punë të vështirë.

Mbështetje e komunitetit vendas

Unë besoj me vendosshmëri se angazhimi dhe përfshirja e komunitetit vendas është çelësi për rezultate të suksesshme të projektit Trees for Lurë, në terma afatgjatë.

Ekziston një mungesë totale të vendeve të punës në zonat rurale siç është Lura. Prandaj i propozuam komunitetit vendas që të na ndihmonte me punën që duhej bërë, kundrejt pagesës.

Ne i ofruam të gjithëve pagë të mirë, ramë dakord për çmimin për gropë dhe i paguam të gjithë në fund të secilës ditë pune. Kjo u dha njerëzve fleksibilitet për të zgjedhur ditët e tyre të punës. Disa vendosën të punojnë falas, të tjerët u paguan.

Djemtë punuan shumë, madje thanë se terreni ishte i lehtë për t’u punuar! Unë nuk jam shumë i sigurtë për këtë! U përpoqa dhe në pjesën më të madhe, dështova… :)

Ne jemi krenarë që mund të kontribuojmë drejtpërdrejt në komunitet dhe të ndihmojmë aty ku mund të bëhet një ndryshim i vërtetë.

Nryshime në projekt, AdZM

Ka pasur ndryshime në minutën e fundit në projektin tonë, bazuar në sugjerimet e AdZM Dibër. Kjo solli edhe ndryshimin e zonës së mbjelljes dhe mbjelljen e Pinus Nigra (100%) e cila i përshtatet zonës.

Arsyeja kryesore është se Parku Kombëtar i Lurë-Mali Dejës është i ndarë në tre zona për sa i përket mbrojtjes së mjedisit. Zona e kategorisë së parë dhe më e mbrojtur është ajo rreth liqeneve.

Në këtë zonë lejohet të mbillen vetëm disa lloje pemësh të cilat rriten në të njëjtën kuotë/lartësi.

Problemi këtu ishte lartësia mbi nivelin e detit. Është pothuajse e pamundur të sigurohen fidanë të kuotave të larta mbi nivelin e detit në Shqipëri. Deri tani nuk kemi informacion nëse ka furnizues të mundshëm që tregtojnë pemë të përshtatshme për kuotën e zonës tonë të mbjelljes.

Në bashkëpunim me AdZM Dibër do arrijmë objektivat e 2021, e sipas kërkesave dhe sugjerimeve të tyre zona e re është zgjedhur në një kuotë më të ulët.

Kjo do të na lejojë të sjellim pemë në Lurë për të cilat është 100% e sigurtë që rriten në zonë dhe kanë probabilitet më të lartë për të mbijetuar.

Mënyra të reja donacioni

Faqja e donacioneve është përditësuar, për t’i bërë donacionet më të lehta dhe pa kosto shtesë.

Tani është e mundur të bëhen donacione drejtpërdrejtë në llogaritë tona bankare në Shqipëri. Për donatorët nga vendet e BE-së është edhe llogaria bankare e FAR&FURTHER z.s. e cila mbledh donacionet brenda Bashkimit Evropian.

Ç’pritet më tej?

Në javët e ardhshme do të udhëtojmë nëpër Shqipëri. Do të vizitojmë pika të shitjes së pemëve për të zgjedhur furnizuesit më të mirë të fidanëve për projektin tonë.

Fidani më i mirë nuk është ai më i liri, por një Pinus Nigra i shëndetshëm 2-3 vjeçar, i cili përmbush specifikimet e cilësisë.

Në emër të gjithë ekipit,
Pavel