Përditësim #19: Përmbledhje për vitin 2023 / Janar 28, 2024

Do të donim ta nisnim mbarë vitin 2024 duke parë pak nga punët dhe arritjet e vitit të kaluar, pasi 2023 ishte pa dyshim vit me plot sfida për ne. Jo vetëm që mbollëm 10,000 fidanë të tjerë, por gjithashtu ndërtuam një serë të re, përmirësuam fidanishten si dhe zgjeruam gamën e aktiviteteve tona duke përfshirë fëmijët gjatë eventeve me shkollat.

Trees for Lurë feston 3 vjet

Kemi pregatitur një material të shkurtër ku kemi përmbledhur punën tonë të bërë gjatë tre viteve të fundit, duke përmendur informacione të rendësishme të projekteve tona të Ripyllëzimit, Fidanishtes dhe Komunitetit .

Broshurat mund të lexohen në Anglisht, Shqip, Çekisht dhe Gjermanisht.

Ripyllëzimi

Në vitin 2023 mbollëm me sukses 10,081 fidanë të llojit Pishë e zezë ku u rijetëzua 6.38ha terren pyjor brenda Parkut Kombëtar Lurë-Mali Dejës, duke e çuar numrin e fidanëve të mbjellë prej Trees for Lurë në një total prej 22,793 fidanësh dhe sipërfaqe të ripyllëzuar në një total prej 15.22ha.

Për më shumë informacion, vizitoni faqen tonë të Ripyllëzimit. Mund të lexoni gjithashtu edhe raportin e detajuar për mbjelljen e vitit 2023 në Përditësim #18: 10,081 fidanë të mbjellë në 2023.

Fidanët e parë nga fidanishtja jonë

Ky vit ka qenë tepër i veçantë për ne pasi për herë të parë mbollëm fidanë të llojit Pishë e zezë të rritur nga fara në fidanishten tonë, në Fushë-Lurë. Kjo përveçse shënon një arritje të madhe për Trees for Lurë, na jep mundësinë të kemi ulje të konsiderueshme të kostove vjetore në të ardhmen si dhe na ndihmon të kontribuojmë gjatë e në mënyrë të qëndrueshme me nismën tonë të ripyllëzimit, brenda Parkut Kombëtar Lurë-Mali Dejës.

Numra rekord të përfshirjes së komunitetit

Në vitin 2023 arritëm një numër rekord të punëtorëve që na u bashkuan gjatë sezonit të mbjelljes. Në vitin 2021 e nisëm operacionin e ripyllëzimit me vetëm 6 punëtorë, ndërsa sivjet arritëm të punësonim 35 punëtorë. Kjo rritje interesi për të punuar me ne ka të bëjë mbi të gjitha me fitimin e besimit të komunitetit vendas, duke punuar me ta në mënyrë transparente, të drejtë dhe konsistente për tre vite rradhazi.

Evente me shkollat

Këtë vit prezantuam një mënyrë të re për të përfshirë shkollat, me fëmijë nga fshati i Fushë-Lurës dhe nga e gjithë Shqipëria. Qëllimi kryesor i këtyre eventeve është krijimi i një programi edukues ku të përfshihen fëmijët gjatë sezonit të mbjelljes. Patëm mundësinë t’ju tregonim fëmijëve të gjithë procesin, nga fara - tek fidanët e moshave të ndryshme në fidanishte - tek mbjellja e fidanëve në terren, në Parkun Kombëtar Lurë-Mali Dejës. Arritëm ta realizonim këtë aktivitet në tre evente me tre shkolla të ndryshme. Mund të lexoni më tepër mbi eventet me shkollat për 2023 në Përditësim #17.

Fidanishtja

Përmirësimi dhe zgjerimi i fidanishtes ishte një ndër objektivat tonë kryesorë për vitin 2023. Kemi punuar vërtetë fort për të përmirësuar procesin dhe metodën e rritjes së fidanëve në mënyrë që të arrinim rezultate më të mira për të rritur kapacitetin prodhues të fidanishtes.

Për më shumë informacion, vizitoni faqen e Fidanishtes.

Sera

Sera është një element thelbësor për të zgjatur sa më shumë periudhën e vegjetacionit, sidomos kur kemi të bëjmë me një klimë të ftohtë si ajo e Lurës. Në pranverë të 2023 ndërtuam serën tonë të parë me dimensione 13m x 5m (65m²) me një kapacitet prodhues prej 15,000 fidanësh. Deri tani kemi arritur të rrisim 5,600 fidanë të llojit Pishë e zezë dhe 3,000 fidanë të llojit Bredh, farën e të cilëve e mbollëm në Maj 2023.

Farat

Kemi përmirësuar prcesin e trajtimit të farave dhe pregatitjen e tyre për mbjellje. Të gjitha farat kalojnë në një proces pastrimi dhe seleksionimi për të siguruar një shkallë më të lartë mbirje. Gjithashtu, nëpërmjet procesit të Shtresëzimit (Stratification process) përmirësohen akoma më tepër rezultatet e mbirjes. Për më shumë detaje, lexoni Përditësim #15

Vazo të riciklueshme për farat

Në vitin 2022 kemi përdorur qese plastike për të rritur fidanët tanë të parë. Në 2023 vendosëm të investojmë në vazo të riciklueshme nga një kompani Suedeze. Ata prodhojnë vazo nga plastikë e ricikueshme të cilat zgjasin 10 vite përdorim. Vazot që aktualisht ne përdorim janë të llojit BCC HIKO V120SS të cilat përdoren për fidanë një vjeçarë.

Preparati dheut

Krahasuar me vitin 2022, ku përdorëm dhé të thjeshtë dhe pleh, sivjet ndryshuam preparatin në substrat torfe. Ky preparat ka vlera të përshtashme pH dhe nuk ka shtesa plehu apo aditivësh, duke minimizuar infeksionet mykotike në fazat e hershme të mbirjes së farës si dhe duke na dhënë kontroll mbi plehrat organikë që përdorim.

Sistemi i monitorimit

Kemi ndërtuar një sistem monitorimi dhe kontrolli i cili është thelbësor për mbarëvajtjen e fidanishtes. Sistemi mbledh të dhëna mbi klimën, temperaturat dhe lagështirës brenda dhe jashtë serës, si dhe nivelit të lagështisë nëpër vazo brenda në serë. Më pas, të dhënat dërgohen nëpërmjet sistemit GSM në kompjuterat tanë. Ne i përdorim këto të dhëna për të përcaktuar kohën dhe sasinë e vaditjes, hedhjes së plehrave organikë, apo për të përcaktuar detyra të tjera të rëndësishme në fidanishte.

Partnerë & Donatorë

Duam të falenderojmë të gjithë partnerët dhe donatorët që na kanë mbështetur gjatë vitit 2023. Në faqen tonë mund të gjeni një seksion të ri me emrin Partnerët ku mund të gjeni informacion më të detajuar mbi format e bashkëpunimit me të gjithë partnerët tanë.

risr/, Angli

Falenderojmë në mënyrët të veçantë risr/ për mbështetjen e vazhdueshme. Kontributi i tyre ishte thelbësor për ndërtimin dhe zgjerimin e fidanishtes gjatë vitit 2023.

BestSeller, Shqipëri

Jemi krenarë të njoftojmë që BestSeller ështe një ndër partnerët tanë më të rinj. Na lumturon që një markë kaq e njohur dhe Shqiptare i është bashkuar nismës tonë. BestSeller vendosi që nga viti 2023 të na mbështesë finaciarisht në terma afatgjatë.

One Tree Planted, USA

Që në fillim të vitit 2023 kemi punuar me One Tree Planted për të realizuar projektin e tyre të parë të ripyllëzimit në Shqipëri. Ata na siguruan bashkë-financim për mbjelljen e 10,000 fidanëve si dhe na udhëzuan mbi metodologjinë e duhur se si të monitorojmë projektet tona të ripyllëzimit.

Në emër të gjithë ekipit,
Pavel