Përditësim #8 / Shtator 21, 2021

Jam jashtëzakonisht i lumtur që mund të ndaj (më në fund) disa lajme të mira! Kemi bërë shumë deri tani, nga planifikimi i eventeve, shtruajtja e projektit dhe dërgimi i shkresave të ndryshme nëpër institucione dhe më në fund e gjithë puna e madhe u pagua! Kemi një dritë jeshile për aktivitetet e vjeshtës!

Aprovim nga AKZM dhe AdZM

Hapi më i madh për ne si OJF ishte marrja e lejes për të vepruar brenda Parkut Kombëtar të Lurë-Mali Dejës nga AKZM dhe AdZM Dibër.

Kemi marrë përgjigje pozitive nga AKZM dhe AdZM dhe zyrtarisht na lejohet të punojmë brenda Parkut Kombëtar.

Kemi arritur të krijojmë marrëdhenie të mira dhe komunikim të hapur me AdZM Dibër. Më duhet të falënderoj z. Atrit Lika dhe AdZM Dibër për mbështetjen dhe sugjerimet e tyre.

Kombinim i ri i pemëve

Bazuar edhe në komunikimet me AdZM, do na duhet të ndryshojmë kombinimet e pemëve të cilat do mbjellim. Pisha e zezë (Pinus nigra) nuk është lloji i gabuar, por është më pak e favorshme për atë mjedis.

Kombinimi i pemëve të reja përbëhet nga 50% pishë ballkanase (Pinus Peuce), 30% bredh (Abies alba) dhe 20% ahu evropian (Fagus sylvatica).

Ky kombinim do bëjë të mundur krijimin e pyllit me pemë halore, të cilat janë tipike për Lurën.

Jemi shumë entuziastë që po përdorim pishën ballkanase (Pinus Peuce) sepse është një specie e rrezikuar, e cila ka qenë më herët pjesë e pyllit të Lurës.

Zona e re

Javën e kaluar kemi vizituar vendet rreth Liqenit të Zi, për të vlerësuar zonën dhe për të marrë vendimin përfundimtar mbi përshtatshmërinë e saj për të mbjellë.

U mor vendimi (nën konsultimin e AdZM) që të ndyshohej zona e mbjelljes nga A1,A2 / Liqeni i Zi tek zona area A7 / Liqeni i Luleve.

Arsyeja kryesore është terreni i vështirë përreth Liqenit të Zi i cili do ta bënte gërmimin e gropave për fidanët, të komplikuar dhe me kosto të lartë. Gjithashtu, një avantazh tjetër për zonën A7 është sipërfaqja e saj (më shumë se 11ha) dhe mund të vazhdojmë të punojmë në të njëjtën zonë edhe vitin e ardhshëm.

Prova e mbjelljes me fara

Megjithatë, Liqenin e Zi nuk do e braktisim. Do ta përdorim këtë zonë për të testuar mbjelljen me fara në vend të fidanëve. Kjo mund të jetë provë interesante!

Ka plot zona të Parkut Kombëtar të Lurë-Mali Dejës të cilat janë vërtet të vështira për t’u ripyllëzuar me fidanë dhe mbjellja me fara, në këtë rast, është një metodë ideale.

Metoda e mbjelljes me fara do të na lejojë rritjen e përpjekjeve për ripyllëzim, në mënyrë ekonomikisht të qëndrueshme.

Çfarë vjen më pas?

Kemi edhe 6 javë për të jetëzuar objektivat e këtij viti dhe gjërat po ecin me shpejtësi të madhe, gjë që është shumë emocionuese!

Jemi në rrugën e duhur! Gjithçka është e organizuar për të filluar gërmimin e 2 500 gropave gjatë fundjavës së fundit të shtatorit dhe fundjavës së parë të tetorit.

Datat paraprake për eventin e mbjelljes së pemëve janë 23-31 tetor.

Na ndiqni në Instagram dhe në Facebook për përditësime të vazhdueshme.

Në emër të gjithë ekipit,
Pavel